。。。神探福爾摩B。。。

偵探片從來都唔係我杯茶，不過呢齣似係動作片多D囉，不經不覺2個半鐘，Robert Downey 個樣好古惑，唔似一慣的福爾摩斯，不過又好吸引人，同Jude Law好有火花，好演繹得出個種拍檔的互信，同埋好舖排一定有下集囉，總言之齣戲不過不失，響屋企睇同去戲院都冇所謂

冷冷冷

好凍ar, 各位take care

。。。吸血新世紀2新月傳奇。。。

因為看了第1集，收看第2集變得理所當然，情況有如哈里波特，開始左就會1集1集追落去

一齣完全為吸引女觀眾﹝讀者﹞的作品，百年彊屍﹝Edward﹞，有錢，有品味仲要深情，居然情迷一個18歲0靚妹﹝Bella﹞，而個0靚妹未夠18歲就已經開始怕老，想到一個持久過打botox的方法去駐顏，就係把心一橫變埋做彊屍，好嘞到隻彊屍失蹤，又有一隻人狼大隻男﹝Jacob﹞常伴左右，徘徊冰火兩極之間，滿足各少、中女的心底慾望，但係個ending睇到火起

Edward：Thanks, 你呢段時間照顧Bella
Jacob：我咁做唔係因為你
Bella：Edward，等我同佢講
Bella：Jacob, I Love you, 不過你唔好要我揀，因為從一開始我都只會揀佢

頂x 200萬law，贏左仲要攞彩，咁冇品，幾靚仔冇用啦，仲話做左百幾年彊屍

。。。Avatar。。。

不討論劇情，因為故事可以話沒有新意，是影射白人侵略美州大陸好，或是提醒世人珍惜地球亦好，總言之就是一個簡單的故事

但要用2個半鐘包裝一個簡單故事，就一定要提供大量亮麗畫面，先至可以留住觀眾的注意力

一個天馬行空的國度，所有生物，植物都係一種創作，人與人，人與動物的溝通方法，都係一個湛新的方式，不得不佩服幕後製作人的心思，好想再去imax睇一次，想感受一下，透過巨幕呢個Pandora有幾靚

。。。花木蘭。。。

唧唧複唧唧，木蘭當戶織
不聞機杼聲，唯聞女歎息

問女何所思，問女何所憶

女亦無所思，女亦無所憶

昨夜見軍帖，可汗大點兵

軍書十二卷，卷卷有爺名

阿爺無大兒，木蘭無長兄

願為市鞍馬，從此替爺征

‧‧‧

去睇花木蘭，令我諗起呢篇課文，記得當時要背默，估唔到相隔X年，仍然記憶猶新，當然唔可能完整背出啦

整部戲的場境都有一種好蒼茫嘅感覺，因為要保護國家，所有兒女私情都要靠邊站，所有事都係無奈

每次睇戰爭片都會好感慨，我們身處一個平安的地方，唔需要上戰場，唔需付出性命，實在幸福

胡軍─剛陽、豪邁，香港好似未有一個同類型的男星，

陳坤─陰柔、文弱，兩者好大的對比，2個都係內地演員，2個我都喜歡

北上消費﹝玩、下﹞

冇諗過會響深圳睇戲，但係因為想食埋晚飯先返香港，只好搵d節目殺時間，由於唔想去按摩，所以與友人決定去睇戲，個感覺幾新鮮﹝果然大鄉里﹞

戲是新上映的花木蘭，一齣原本已經打算去睇嘅戲，票價RMB50，(高消費呢，內地人平均月入都只不過4,5千) 其實都係一般迷你戲院格局，但係保留左闊銀幕，激讃﹝至憎又一城個窄銀幕，零願響屋企睇電視﹞我地睇果間院只有7行，不過第一行距離銀幕仲好遠，換轉響香港，一定會放多3行櫈

間戲院開左4年，所有野都好新淨，又坐得舒服，下晝5點幾有8成入坐﹝可能位少﹞一開場就好似時光倒流咁，d手提電話不斷響，簡直環迴立體聲，左邊電話響，右邊遠處傳來「係呀，睇緊戲ar‧‧‧」唔係得一個人講wor，仲要個個都講幾分鐘wor，其他觀眾又好似好習慣bor，果然大開眼界，仲有d帶位員好專業ar，響最後一句對白講完，立即開燈，係立即，極有效率呀~~~

最滿足係睇左《風雲2》、《十月圍城》預告片，好吸引呢

又係無聊對話一則，發生在買飛時
winc：花木蘭唔知係唔係講普通話呢
友：梗係
winc：死啦，會唔會冇字幕架
友：冇都唔緊要la，聽得明la
winc：下，我睇宮心計都追字幕架bor
友：咁你自己問售票員嘞
winc：﹝已經出左飛，面矇矇走返埋去﹞請問有冇字幕呢？
售票員A：唔好意思，我未睇唔知，幫你問下
售票員B﹝搭咀﹞：我頭先睇左，有
(佢個表情話我知，佢係剛剛入左去睇免費場)

整體黎講，是次港燦出城，都玩得幾開心，不過太多時間唔知同d服務員講咩話好，以為廣東話時，佢就煲冬瓜，永遠都仲佢地唔到，正

北上消費﹝玩﹞

第一次出城，梗係要去下d地標先，今次去左金光華廣場，個感覺有d似太古廣場，都係賣一d名牌，地方好大，不過遊人唔多﹝可能唔係咁多我呢類無謂人la﹞，好喜歡商場嘅聖誕怖置，金色聖誕鹿，好靚

閒逛時，
友：你有冇留意到內地人拍拖，係唔會拖住行街架
win：係咩，冇拖手你都知人地拍緊拖
友：哈哈哈哈，你留意下la，真係唔會拖手呢，拖手個d一定係港女，唔信你去聽下佢地係唔係講廣東話
win：深圳人都係講廣東話bor

跟住我地就開始追蹤d疑似情侶la，發現2個男人，or 2個女仔拖住手行街就有好多，1男1女可能並肩行，相差只有2cm，但真係唔拖手wor，估唔到1橋之隔，有呢種差異，但係點解我地又可以肯定佢地係情侶呢！

因為未夠鐘又食飯，同友人去左睇戲﹝幾爆﹞，後續‧‧‧

北上消費﹝食﹞

此行一共2餐，1重1輕，重嘅係：大漁鐵板燒，RMB150任飲任食，任飲包括果汁，汽水，啤酒，清酒，紅酒，花茶，咩都有，任食就有沙律，刺身，壽司，天婦羅，羊架，牛排，甜品‧‧‧不能盡錄，服務唔錯，鐵板師傅會提你，仲有幾多野未食，提你加單，幾好，不過我覺得抵食，但係唔好食，唔會再去，亦都唔會介紹俾朋友，友人話佢上次幫襯個間平d&質素又高d，期待ing

另外1餐輕食，就去左一茶一坐，曾經響上海食過，印象幾好，事關要殺時間等睇戲，所以響仍未飽完嘅情況下又食一餐，本來想食甜點，可惜要果樣冇果樣，只好求其叫左d咸點，同飲杯野，不過不失la，反而牆上的告示，藉得一睇

北上消費﹝買﹞

一直抗拒去深圳消費，雖然都曾經去過深圳嘅的士夠格，亦都去過沖涼DUM骨，之前都有當地人帶路，今次正正式式深圳自由行，個感覺真係好新鮮

因為未去過皇崗(幾娘！) 所以由旺角坐直通車出發，好快，車程35分鐘已經到達，其實坐火車(港鐵先啱，不過真係改唔到口)仲直接，起碼一地2檢唔使周圍走，一出就係(深圳)地鐵福田站，最遠都只不過係RMB3一程，下次都係唔好坐巴士

第一站係少年宮--書城，好大ar，大嘅程度係可以消磨半日時間,設有有幾台電腦方便D讀者搵書，只要輸入書名OR作者，就可以睇到有冇貨，同埋所放位置，超方便，如果我識打倉頡又會好少少，因為只得其中一台可以用速成輸入，本黎打算到此一遊就算，費時抬住D書周圍走LA，但係當見到《兄弟上、下冊》加埋都只不過係RMB50，響香港一本上冊都買唔到LA，簡直係唔買對唔住自己，最終非常忍手都買左幾本，好在同行友人非常有義氣，一直出手相助，如果唔係，應該要早早返香港

完事

有出席，仲完成埋添，沿途一路影相，行下又跑下，冇想像中咁困難，有興趣嘅朋友，出年一齊參加丫，仲有多謝各位好友關心同支持