。。。The Imaginarium of Doctor Parnassus。。。

看了一齣冇打算會看的戲，如果唔係遺作，會唔會吸引到人入場呢，又如果一直只有一個Heath Ledger，又會唔會變得好平凡呢，反而我覺得Lily Cole好特別，雖然佢完全唔似16歲，同埋我唔明佢點解要除衫，不過我真係覺得佢好sexy，令人念念不忘

IMAX

因為巨幕，因為阿凡達，所以又去一次iSquare

iMax個畫面真係好靚、好清，好立體，同埋音響都好好，地點又方便wor，可惜丫，坐響全戲院的正中位置，仍然係會望到銀幕的邊位，都唔明咁大投資，就唔差在個少少空間，每邊只不過留多一兩呎左右，唔好攞到d位咁盡，已經完全唔同晒，仲有我真係唔極度超級like佢張凳，坐2個幾鐘，真係好辛苦ar，所以要我揀的話，The Grand仍然係我首選

同一部戲可以令我入戲院睇2次，係因為響屋企係冇可能睇到呢個畫面，如果仍然未去戲院睇阿凡達的話，可以考慮去iMax，不過真係好難買飛

。。。秋田犬八千。。。

跟友人提起去睇呢部戲，得到的反應係：下，你又啱，你完全唔似喜歡狗狗wor‧‧‧

事實上有得揀，我確係比較喜歡貓，不過問心我只係鍾意d未成年小動物，一完成個成長期，佢地個樣會變晒，完全唔可愛，同埋照顧一隻寵物，所付出的心血不比照顧一個人少，不值得

撐得太遠，賺人熱淚，係呢部戲的賣點，so far佢可以完成任務，不過事實上又唔算真係好感人，都只不過係我眼淺，不過估唔到一隻成年的秋田犬可以咁大隻，同埋d毛可以咁厚，同埋我好想知道最後的八千到底係化左一個老妝、用電腦執、定係一隻老左的秋田犬就係咁嘅樣呢

。。。27 Dresses。。。

一個女仔當27次伴娘，都仲未嫁得出，仲未知自己要咩

劇情真係簡單到爆，橋段同大口茱的走佬俏新娘差不多，而如果要睇等愛的女人，我會揀單身大作戰，起碼得啖笑

Katherine Heigl因呢齣戲令佢片約不斷，係因為宜家荷里活好似幾缺乏呢類型的健康傻大姐

。。。Paris, je t’aime。。。

5分鐘一個故事，18個導演，18個故事，穿梭法國多個地區

每個故事都好特別，比較有印象的有默劇演員遇上他的女主角，父女對話，仲有媽媽跨區工作去當褓姆，有令人回味，亦有令人想fast forward

到底用5分鐘說一個故事難，還是用150分鐘去說故事難，相信要比較都好難，睇完之後好似發生左好多事咁，但又好似唔係好實在，個感覺好虛浮，可能又係因為法文的原因‧‧‧

。。。風聲。。。

上映時已經想去捧場，一直未能配合，終於看了，有d喜出望外~~~

看內地片，要有準備故事情節多少要配合國內的標準，但又因為係講日治時期，所以又唔會覺得好不能接受

所有審問時用刑的片段，大部份都以聲效交代，仍然可以感受到果種殘酷，同埋大宅內的氣氛，絕對顯現出導演與剪接的功力，另外在好早段誰是老鬼，已經呼之欲出，個結尾解開當中一切的伏線，亦令成齣戲變得完整

另一位要注意的國內男星─張涵予

。。。Coco Before Chanel。。。

全片法語對白，靚人、靚衫、靚景不用多講

反而想講當Coco遇上Boy之前，一直沒有笑容，之前所做的只為生活，當遇上一個懂得欣賞而又有能力支持她放手追夢的人，所有才華都得以發揮，個種從心而發的笑容，實在令人感動

要遇上愛你的人不難，但要遇到在未經雕琢時已懂得欣賞你的人，真係修來的福氣

戲院新體驗

對一個極喜歡入戲院的人，新院上場，絕對係一件大事

當iSquare的戲院開幕，急不及待一親芳澤，以一間新戲院的標準，絕對令我大失所望，座位的設計有如我至討厭的又一城AMC，又斜又窄，膝頭更加係與前排座位緊貼，中場為免影響旁人，只好一直死忍，唔敢去洗手間，可取之處係地點方便，同埋音響效果非常之好，可惜俾我會零願多走兩步去較舊的海運又或者繼續去我的至愛，不過宜家The Grand都好難買飛lu

希望工程

友人戲言：你每日出門之前塗塗抹抹，都只不過係一個希望工程，希望睇落去靚D

人生根本就係一個希望工程，希望成家立業，希望健康美麗，又或者希望中六合彩，人生應該充滿希望，凡事盡力而為，就係希望可以有一日可以成功，所以抱有希望，就係面對難關時最大的推動力

家庭日

除節慶又或者阿婆生日之外，好少會幾個家庭一齊總動員聚會，今日好難得咁聚首一堂，齊齊BB焦，真係好開心，四代同堂，有日本回歸的表弟，有一直以為虛構的表弟女友，有人鋤啤，有人打機，有好多笑聲，好熱鬧，好享受身處其中，好似過年一樣，

今日阿婆金句：D野留返俾男人做，由其係D家務

我咁聽老人家說話，一定會銘記於心，哈哈

學習

今年有一個新課題 ─ 成長

一直明白去到的位置越高，肩負的就越多，所以選擇享受生活，遊樂人間，從來都拒絕承擔，曾和友人戲言，當各人都為功課、工作付出的時候，我卻在享樂，過住退休一樣的生活，而當各人開始收成的時候，我又蠢蠢欲動，不甘再處於同一個位置，當有一個疑似機會在面前時，係時候去嘗試一下，唔好再捨難取易，告別練精學懶﹝雖然我已經成精，哈哈﹞，既然感情生活已經唔再係要費心嘅事，咁不如試下發展一下事業，相信明年又會有另一番風景﹝我信一定可以的﹞

Happy New Year